2025 жылғы 18 маусымда Щучинск қаласындағы Жоғары педагогикалық колледж базасында «Қауіпсіз білім беру ортасын құру бойынша білім беру ұйымдарының психологиялық қызметінің өзекті міндеттері» тақырыбында облыстық практикалық конференция өтті. Іс-шараның мақсаты – білім беру мекемелерінде психологиялық қауіпсіздік пен қолайлы орта қалыптастыру, сондай-ақ оқушылар мен студенттердің психикалық саулығын сақтау мақсатында психологиялық қызметтердің өзара іс-әрекетін нығайту. Конференция аясында төрт бағыт бойынша секциялық жұмыстар ұйымдастырылды:

• балалар психологиясы;

• аутодеструктивті мінез-құлықпен жұмыс істеудің этикасы мен тәжірибесі;

• ата-аналармен жұмыс;

• техникалық және кәсіптік білім беру (ТжКБ) ұйымдарындағы психологиялық қызметтің жұмысын ұйымдастыру.

Секциялық отырыстар барысында қазіргі балалардың психологиялық дамуын қалыптастырудың практикалық әдістері, жасөспірімдердің аутодеструктивті мінез-құлқымен жұмыс жүргізудегі этика мен тәжірибе, ата-аналармен жүргізілетін психологиялық ағарту жұмыстары, сондай-ақ сын мен нотациясыз эмоционалды қауіпсіз орта қалыптастыру жолдары сияқты өзекті мәселелер кеңінен талқыланды. Конференция аясында Көкшетау жоғары медициналық колледжінің педагог-психологі Куандыкова Бану Сериковна 2-секцияда «Аутодеструктивті мінез-құлық» тақырыбы бойынша спикер ретінде баяндама жасап, әріптестерімен тәжірибе алмасты. Белсенді қатысқаны мен кәсіби үлесі үшін спикер сертификатпен марапатталды.